కాంక్రీటు గోడల మధ్య కట్టెయ్యని బానిసలం

అద్దాల మేడల్లో ట్యూబులైటు వెలుగుల్లో
జీతానికి జీవితానికి మధ్యలో మన ప్రయాణం

కాంక్రీటు గోడల మధ్య కట్టెయ్యని బానిసలం
రాత్రి పగలు తేడా తెలియని మర మనుషుల ప్రతిరూపాలం

డాలర్ల వేటలో దేశాలైన దాటేస్తాం
రూపాయల రూపంలో అమ్మకి ప్రేమని పంపిస్తాం

విదేశీమారకానికి మారే విలువల్లేని జీవులం
వేలంపాటలో అమ్మబడే కార్పొ"రేటు" వేశ్యలం

పరదేశపు సంస్కృతినే పరమావధి చేసుకొని
మాతృభాషనే మనం నామోషీ అనుకుంటాం

వారాంతపు సెలవులకి వలస వెళ్లే పక్షులం
మిగిలిన ఐదు రోజులు కార్యాలయానికి "కట్టప్ప"లం

EMI ల రూపంలో జీవితాన్ని తాకట్టెట్టి
రానూపోనూ రైలుబండిలో రివాజుగా కుస్తీపట్టి
జీవితపు అనుభవాలు క్యాలండరులో కట్టిపెట్టి
కార్యాలయపు కష్టాలన్నీ పంటికింద బిగపెట్టి
అంధకారపు బందిఖానాలో సంకెళ్లు వెయ్యని మిత్రమా
ఏదేదో చెయ్యాలని ఎందుకంత ఆత్రమోయ్ ...!!!

-రాజు వెలగందుల

నవజీవన సమాజం

పరుగెడితే వెంటవచ్చి , వెనకబడితే నిన్ను వదలి
నిలబడితే నిన్ను తలచి, పడిపోతే నిన్ను మరచె
నవజీవన సమాజం

సకార్యమే పాపముగా , స్వలాభమే ఊపిరిగా
మంచి పనియే వంచనగా, చెడు చేసే
నవజీవన సమాజం

దీనికన్నా శవం నయం
దీనికన్నా శవం నయం ....!!

పరిచయ వాఖ్యాలు

ఎల్లరికి వందనాలు .

చాలా  రోజుల  నుండి  తెలుగు భాషలో  బ్లాగ్  రాయాలని  ఒక  ఆలోచన  . ఇన్ని  రోజులకి  సమయం  మరియు  సందర్భం  వొచ్చిందని   భావించి  ఈ  బ్లాగుకి  శ్రీకారం చుట్టడం జరిగింది.

ఈ బ్లాగుకి నామకరణం "శకునిమామ" అని పెట్టడం వెనక ఆంతర్యం ఏమిటంటే , సినిమాల ప్రభావం వల్ల మనకి వ్యక్తిత్వం పైన అనేక అపోహలు ఏర్పడ్డాయి కానీ మహాభారతంలో శ్రీకృషుని తర్వాత అచంచల తెలివితేటలు మరియు భావనిగ్రహం కలిగియున్న ఏకైక వ్యక్తి శకుని .

ఏది ఏమైనా, నా భావాలని వ్యక్తీకరించడానికి శకునుణ్ణి మధ్యవర్తిగా ఎంచుకోవడం జరిగింది . రానున్న రోజుల్లో ఈ వేదికపై అనేక విషయాల పట్ల నా పరిశీలన మరియు నా వ్యాఖ్యానం వ్యక్తీకరించనున్నాను . మన చుట్టూ ఉన్న నలుగురి ఆలోచనల్లో మార్పు తీసుకు రావడం , మన భాషలో పట్టు కోల్పోకుండా ఉండటం అనేది ఈ నా వ్యాసాల ముఖ్య ఉద్దేశం.